Əməldə ixlasa malik olmaq – həmin əməlin qəbul olmasına və Allahın sevgisinə səbəb olar. Bəs ixlasın nişanələri hansılardır?
1. Yaxşı əmələ meyillilik. Yaxşı əməllər yerinə yetirmək və pis əməllərdən çəkinmək – ixlasın nişanələrindən biridir. Həzrət Peyğəmbər (s) buyurur: “O kəs ki, ixlasla şəhadətləri dilinə gətirər, onları heç nə ilə qarışdırmaz – behiştə daxil olar”.
İmam Əli (ə) soruşur: “Necə ixlasla desin və heç nə ilə qarışdırmasın?”.
Həzrət (s) buyurur: “Dünya hərisliyi, onu haram yolla toplamaq, dünyadan razı olmaq – bunlar qarışıqlardır”.
İmam Əli (ə) buyurur: “Bütün ixlaslar – günahlardan çəkinməkdir”.
2. Təriflənməyi gözləməmək. O kəs ki, yaxşı əməli başqalarının tərifləməsi üçün yerinə yetirər – onu Allah üçün etməmişdir. Həzrət Peyğəmbər (s) buyurur: “Hər bir haqqın həqiqəti vardır. Heç kəs ixlasın həqiqətinə çatmaz, məgər o halda ki, Allah üçün yerinə yetirdiyi əmələ görə təriflənməsini sevməz”.
3. Zahir ilə batinin həmahəng olması. İxlas əhli o kəsdir ki, əgər nə isə ondan aşkar olarsa, həmin şey onun batinində də olar.
Zahir və batin üç haldan xaric deyildir. Ya zahir batindən üstündür, ya əksinədir. Ya da hər ikisi eynidirlər.
Uca Allah Həzrət Musaya (ə) vəhy edir: “Ey Musa! O kəsin ki, zahiri batinindən gözəl olar – Mənim düşmənimdir. O kəsin ki, zahiri və batini bir olarsa – həqiqi mömindir. O kəsin ki, batini zahirindən gözəl olar – Mənim vəlimdir”. (Beytutə/Deyerler)
