Dünən Hacı Cavad məscidində sonuncu Qədr gecəsi keçirilib.
Əvvəlcə camaatla birlikdə şam və xiftən namazları qılınıb. Məclis Qurani-kərimin oxunması ilə başlanıb.
Məscidin axundu, ilahiyyatçı alim Hacı Əhliman Rüstəmov geniş moizə edib.
Qeyd olunub ki, Qədr gecəsi – Allahın kitabı, bəşəriyyətin hidayət çırağı, haqqı batildən ayıran Quranın nazil olduğu gecədir. Qurani-Kərim əziz İslam peyğəmbərinin mübarək qəlbinə iki cür nazil olub: 23 il ərzində hissə-hissə və Qədr gecəsində bütövlükdə. Yəni Həzrət Peyğəmbər (s) hələ insanlara Quranı çatdırıb qurtarmamışdan öncə, Qədr gecəsində Allah kitabını bütövlükdə mənimsəmişdi.
Quranı baş üzərində tutmaqla Allahın, Peyğəmbərin (s) və imamların adlarına and verməklə günahların bağışlanması istənilib. “Cövşən Kəbir” duası oxunub.
Sonda məscidə gələnlərə imsak verilib. Mərasim sübh namazının camaatla qılınması ilə başa çatıb.
