İğdır – Tuzlucada Həzrət Mehdinin (ə.f) təvəllüdü münasibəti ilə tədbir keçirilib
İğdırın Tuzluca qəsəbəsində Həzrət İmam Mehdinin (ə.f) təvəllüdü münasibəti ilə bu gün mərasim təşkil olundu. Artıq 9 ildir ki, Türkiyə “Cəfəri Alimlər Birliyi” və İğdır “Ali-Əba” dərnəyinin birgə təşkil etdiyi tədbirə Türkiyə, Azərbaycan, Gürcüstan və İrandan bir sıra din xadimləri, alimlər və dövlət rəsmiləri dəvətli idi.
Kanal on4, CEM tv və Kackar Tv vasitəsi ilə canlı yayımlanan tədbirdə çıxış edən Türkiyə Cəfəriləri lideri Şeyx Səlahəddin Özgündüz, İranın Zəncan şəhərinin İmam cüməsi Ayətullah Hatəmi, Bakıda yerləşən Hacı Cavad məscidin İmam cüməsi dəyərli din alimi Hacı Əhliman Rüstəmov, Gürcüstan Müsəlmanları İdarəsinin şeyxi Hacı Ramin İgidov və başqa ruhani və elm adamları Həzrət İmam Mehdinin (ə.f) qeybə çəkilməsinin və zühurunun tezləşməməsinin səbəbləri, zühurun və intizarın mahiyyət və fəlsəfəsi, İslam ümmətinin İmamın zühuru üçün üzərinə düşən vəzifələr və s. mövzular haqqında geniş söhbətlər etdilər. Tədbirə dəvət olunan Gürcüstanlı Əhlibeyt məddahı Səid Həsən ilahilər oxudu. Nəhayət şeir və qəsidələrlə davam edən tədbir az yaşlı uşaqların birgə oxuduğu ilahi və Fərəc duası ilə sona çatdı.
