Namazdan sonrakı ən yaxşı əməl Həzrət Zəhranın (s.ə) təsbihatıdır (zikridir). Bu ali zikri Allahın Rəsulu (s) əziz qızına öyrətmişdir: “34 dəfə “Allahu əkbər”, 33 dəfə “Əlhəmdulillah” və 33 dəfə “Subhanallah.”
Bu qaydada Allahın böyüklüyünə yüz dəfə sitayiş etmək, nemətlərinə şükür etmək, Onu hər şeydən uca, müqəddəs və pak bilmək, İmam Sadiqin (ə) buyurduğu kimi, Allah yanında min rükət müstəhəb namazdan üstündür.[1]
Bu təsbihat Əhli-sünnənin mənbələrində də göstərilmişdir.[2]
İmam Baqir (ə) buyurmuşdur: “Sitayişlər arasında Həzrət Zəhranın (s.ə) zikrindən daha yaxşısı yoxdur. Əgər olsaydı, Allahın Rəsulu (s) Həzrət Fatiməyə (s.ə) öyrədərdi.”[3]
Hədislərdə şəhidlər sərvərinin torpağına səcdə edilməsi təkidlə vurğulandığı kimi, İmam Hüseynin (ə) məzarının torpağından 34 dənəlik təsbehə sahib olmağın da böyük savabı vardır. Hətta zikrlər etmədən də möminin onu sadəcə olaraq yanında saxlaması belə çox dəyərlidir.[4] Çünki Allaha xatir cihad, şəhidlik və qiyam mədəniyyəti üçün ilham mənbəyi sayılır.
Əsas odur ki, bu zikri təmkinlə, düşünərək və diqqətlə söyləmək lazımdır.
Ancaq sözlər sürətlə, tez-tez və anlaşılmaz şəkildə deyilməməlidir. Bu zikr nə qədər vüqarla, üç əsas zikrə diqqət yetirməklə söylənərsə, Allah dərgahında daha dəyərli və insan üçün daha faydalıdır.
[1] Mustədrəkül-vəsail, 1-ci cild, səh.336.
[2] Səhihi-Muslim, 1-ci cild, səh.418; “Səhihi- Buxari”, səh.110; “Əbi Macənin sünnətləri”, 1-ci cild, səh.299.
[3] Vəsailuş-şiə, 4-cü cild, səh.1024.
[4] Cəvahirul-kəlam, 10-cu cild, səh.405.
