Allah tərəfindən İmam Məhdiyə (ə.f) zühur izni verildikdə o Həzrət (ə.f) dünyanı islah etmək üçün qiyam edər və Allahın evinin yanında Rükn və Məqam arasında haqq hökumətin ordu və dövlət rəhbərləri olan sədaqətli silahdaşlarından beyət alar, söyləyəcəyi ilk cümlə bu ayədir:
بقيه الله…
Bu barədə İmam Baqir (ə) buyurub: “Məhdi (ə.f) aşkara çıxdıqda arxasını Kəbə evinə söykəyərək söyləyəcəyi ilk söz bu mübarək ayədir:
بَقِيَّةُ اللّهِ خَيْرٌ لَّكُمْ إِن كُنتُم مُّؤْمِنِينَ…
“Əgər möminsinizsə, Allahın saxladığı sizin üçün daha yaxşıdır.”[1]
Daha sonra buyurar: “Mən sizin aranızda Bəqiyyətullaham, Allahın xəlifəsiyəm və Allahın höccətiyəm” və o zaman hamı onu belə salamlayar: “Salam olsun sənə, ey Bəqiyyətullah!”
Həmçinin Məfzəl İmam Sadiqin (ə) belə buyurduğunu deyir: “Məhdi (ə.f) arxasını Kəbənin divarına söykəyərək bütün dünyaya müraciət edəcək: “Kim Adəm və Şeysi görmək istəyirsə, budur, mənəm Adəm və Şeys. Kim Nuh və Samı görmək istəyirsə, budur, mənəm Nuh və Sam. Kim İbrahim və İsmaili görmək istəyirsə, mənəm İbrahim və İsmail. Kim Musa və Yeşuanı görmək istəyirsə, budur, mənəm Musa və Yeşua. Kim İsa və Şimonu görmək istəyirsə, budur, mənəm İsa və Şimon. Kim Muhəmməd (s) və Əlini (ə) görmək istəyirsə, budur, mənəm Muhəmməd (s) və Əli (ə). Kim Həsən (ə) və Hüseyni (ə) görmək istəyirsə, budur, mənəm Həsən və Hüseyn (ə). Kim Hüseynin (ə) övladlarından olan imamları görmək istəyirsə, budur, mənəm Hüseynin (ə) pak nəslindən olan həmin məsum imamlar.
İndi isə sözlərimə qulaq asın ki, sizi eşitdiklərinizdən və bildiklərinizdən, habelə indiyə qədər eşitmədiklərinizdən və bilmədiklərinizdən agah edim… Səmavi kitabları tanıyan hər kəs qulaq assın…”
Daha sonra İmam Məhdi (ə.f) səmavi kitabları oxumağa başlayar və Adəm, Şeys, Nuh və İbrahimin (ə) müqəddəs yazılarını oxuyar, həm Tövratı, həm İncili və Zəburu… sonra isə Qurani-Kərimi…”[2]
[1] Hud surəsi, 86-cı ayə
[2] Biharul-ənvar, Əllamə Məclisi, c.53, səh.9
