Bəşir ibn Əmr əl-Həzrəmi Bəşir Yəmənin Həzrəmut vilayətindəndir. Kərbəlada şəhid oldu. Adı Kərbəla şəhidlərinə məxsus Rəcəbiyyə ziyarətində də keçir. O, əshabdan ən sonda və Bəni-Haşimdən öncə şəhid olan iki nəfərdən biridir. Çox vəfalı və bəsirətli bir kişi idi. Bəşir İmam Hüseynin (ə) karvanına Aşuradan bir neçə gün öncə Kərbəlada qoşuldu. O, Reydə əsirlikdə və həbsdə olan oğlunun sorağına gedəcəkdi. Buna görə də İmam Hüseyn (ə) ondan beyətini götürdü və gedə bilərsən dedi. Amma o özünü beyətdən azad etmədi və imamını tək buraxmayaraq dedi: “Əgər səni tək qoyarsam, yırtıcılar məni diri-diri yesinlər! Mən gedim?! Getmək üçün səndən minik istəyim?! Səni bu az əshabınla tək qoyum, özüm isə asudə xatirlə geri qayıdım?! Yox, heç vaxt bu belə olamayacaq! “ Aşura günü bütün əshab şəhid olmuşdu. Təkcə iki nəfər qalmışdılar. O iki nəfərdən biri Bəşir idi. İmamdan (ə) döyüşmək üçün icazə aldı. Düşmənlərə hücum çəkdi. İlk döyüşdə şəhid oldu. Mübarək məzarı Kərbəlada İmam Hüseynin (ə) ayaq tərəfində şəhidlərin ümumi dəfn olunduqları yerdədir. Bəzi qaynaqlarda adı Buşr ibn Ömər keçib. Cavad Mühəddisi, “Aşura ensiklopediyası”, s.65.
