Hansı imamın ziyarəti daha fəzilətlidir?
Bəzi hədislərə əsasən İmam Rzanın (ə) ziyarəti İmam Hüseynin (ə) ziyarətindən daha fəzilətlidir. Bu hədisləri eşidən bir qrup şiənin zehnində sual yaranmışdı ki, axı bu necə olar bilər?
Əli ibn Məhzyar adlı məşhur şiə ravisi bunu Həzrət İmam Rzanın (ə) oğlu və 9-cu imam Həzrət İmam Cavaddan (ə) soruşur.
İmam (ə) da cavabında buyurur ki, İmam Rzanı (ə) ziyarət edənlərin “imamət” əqidəsi səhih əqidədir, onlar 12 imamçıdırlar, İmam Hüseyni (ə) isə özünə “şiə” deyən bütün firqələr ziyarət edir.
Başqa sözlə desək, İmam Rzanın (ə) zamanında və ondan öncə yaranmış Vaqifiyyə, İsmailiyyə, Fətəhiyyə və sair firqələrin batil olmasını və 12 imamçı şiə əqədisənin səhih olmasını cəmiyyətə çatdırmaq üçün İmamlarımız (ə) İmam Rzanın (ə) ziyarətini təkidlə vurğulayıblar və bu ziyarəti Peyğəmbəri (s) ziyarət etmək kimi və İmam Hüseynin (ə) ziyarətindən daha üstün hesab ediblər. Çünki İslam və imanın kamalı olan “imamət” əqidəsi (12 imamçı şiə = imamiyyə) İmam Rza (ə) və ondan sonrakı imamların imamətini qəbul etməklə təşkil tapır.
Qeyd: İmam Rzanın (ə) ziyarətinin daha üstün olmasını deyən hədislər əl-Kafi (4/584) və digər hədis məcmuələrində nəql edilib. Bəzi araşdırmaçıların məqalələrinə əsasən Əllamə Məclisi bu hədislərin 39 səhih və 5 həsən sənədlə nəql edildiyini deyib. (Ləvame SahibQərani, 8/548)
